Xəbərlər

Macarıstan Kənd Təsərrüfatı və Həyat Elmləri Universitetinin bir qrup nümayəndəsi Əkinçilik ET İnstitutunda olublar

Macarıstan Kənd Təsərrüfatı və Həyat Elmləri Universitetinin bir qrup nümayəndəsi tanışlıq və gələcəkdə elmi əməkdaşlıq əlaqələrinin yaradılması məqsədilə Əkinçilik ET İnstitutunda olublar. Görüşdə institutun direktoru Faiq Xudayev, direktor müavinləri, laboratoriya və şöbə müdirləri iştirak ediblər.

Görüş zamanı institutun tarixi, fəaliyyət istiqamətləri, mandatına daxil olan bitkilər, aparılan elmi-tədqiqat işləri, tədqiqat prioritetləri və hədəflərdən söz açan  institutun direktoru diqqətə çatdırıb ki, qarşılıqlı əməkdaşlığı inkişaf etdirmək üçün institut böyük elmi potensiala malikdir.

Macarıstan Kənd Təsərrüfatı və Həyat Elmləri Universitetinin Kənd Təsərrüfatı Elmi-Tədqiqat Stansiyasının rəhbəri, aparıcı mütəxəssis, PhD Melinda TAR öz növbəsində universitetin tarixi haqqında məlumat verib. O, bildirilib ki, universitet 2000-ci ildə bir neçə kiçik institutun birləşməsindən sonra yaranıb. Macarıstanın paytaxtı Budapeşt şəhərindən təxminən 30 km məsafədə yerləşən texnoloji universitetdir. Universitetdə kənd təsərrüfatı və ətraf mühit elmləri də daxil olmaqla səkkiz fakültə vardır. Burada təxminən 15000 tələbə təhsil alır.

Görüşdə kənd təsərrüfatı sahəsində institutlar arasında əməkdaşlığın daha da inkişaf etdirilməsi perspektivləri müzakirə olunub. Müzakirələrdə aqrar təhsil, aqrar tədqiqatlar və digər istiqamətlər üzrə texnologiya mübadiləsi barədə əməkdaşlıq məsələlərinə də toxunulub. Sonra ilk görüşün nəticələrini yüksək dəyərləndirən tərəflər əməkdaşlığa dair iş birliyinin qurulması barədə ilkin razılaşma əldə ediblər.

Daha sonra görüş iştirakçıları laboratoriyalara, genbanka, elmi muzey və kitabxanaya baxış keçiriblər, instutut tərəfindən yaradılan sortlar haqında məlumatları özündə əks etdirən nəşrlərlə tanış olublar.

Hər iki tərəf görüşün nəticələrindən məmnunluq duyduqlarını bildiriblər. Sonda xatirə şəkili çəkilib. 

© 2020 Əkinçilik ETİ