“Heydər Əliyevin Vətən səfərləri” seriyasından olan növbəti kitab sərgilənib

AR Mədəniyyət Nazirliyinin təşkilatçılığı ilə Bakı Ekspo Mərkəzində keçirilən 10-cu Bakı Beynəlxalq Kitab Sərgisində Vəsimə İsmayılqızının “Heydər Əliyevin Vətən səfərləri” seriyasından olan, Ulu öndərin müxtəlif dövrlərdə Goranboy rayonuna etdiyi unudulmaz səfərləri özündə əks etdirən “Goranboyda izim qaldı” kitabı da sərgilənib.

Sözü gedən kitabda Kənd Təsərrüfatı Nazirliyi Əkinçilik Elmi-Tədqiqat İnstitutunun “Davamlı əkinçilik və bitki diversifikasiyası” şöbəsinin böyük elmi işçisi, o zamanlar Goranboy rayonunun Qızılhacılı kəndində pambıq sahəsinin briqadiri işləmiş Baxşəliyeva Solmaz Sabir qızının 1982-ci il 14 iyul tarixində Ulu Öndərlə görüşü haqqında xoş xatirələri də əks etdirilib.